రాష్ట్ర ప్రభుత్వం దివ్యాంగుల సంక్షేమానికి బడ్జెట్లో తగిన ప్రాధాన్యత ఇవ్వలేదని వికలాంగుల హక్కుల పోరాట సమితి ఆరోపించింది. ఎన్నికల మేనిఫెస్టోలో ఇచ్చిన హామీలను నెరవేర్చడంలో ప్రభుత్వం విఫలమైందని సమితి జాతీయ అధ్యక్షులు సిద్ధార్థ సూర్యవంశం విమర్శించారు.
వికలాంగుల హక్కుల పోరాట సమితి జాతీయ అధ్యక్షులు సిద్ధార్థ సూర్యవంశం మాట్లాడుతూ, ప్రభుత్వం దివ్యాంగులకు బడ్జెట్లో స్థానం కల్పించలేదని ఆరోపించారు. ప్రభుత్వం ఏర్పడి మూడు సంవత్సరాలు గడుస్తున్నా, మేనిఫెస్టోలో హామీ ఇచ్చినట్లుగా దివ్యాంగుల పెన్షన్లు పెంచలేదని, అదేవిధంగా వృద్ధులు, వితంతువులు, బీడీ కార్మికులకు కూడా పెన్షన్లు పెంచలేదని ఆయన పేర్కొన్నారు.
బ్యాక్లాగ్ పోస్టుల భర్తీ, దివ్యాంగులకు ఇళ్ల నిర్మాణం వంటి హామీలను కూడా ప్రభుత్వం నెరవేర్చలేదని సిద్ధార్థ సూర్యవంశం తెలిపారు. పొరుగు రాష్ట్రాల తరహాలో సంక్షేమ పథకాలు అమలు చేస్తామని చెప్పి, అధికారంలోకి వచ్చాక మోసం చేశారని ఆయన ఆరోపించారు.
దివ్యాంగులకు బస్సుల్లో ఉచిత ప్రయాణ సౌకర్యం కల్పించాలని, మహిళలకు కల్పిస్తున్న ఉచిత ప్రయాణ సౌకర్యాన్ని తమకు కూడా విస్తరించాలని ఆయన డిమాండ్ చేశారు. బడ్జెట్లో ఈ డిమాండ్లను నెరవేర్చకపోతే, రాష్ట్రవ్యాప్తంగా నిరసన కార్యక్రమాలు చేపడతామని హెచ్చరించారు.
వికలాంగుల హక్కుల పోరాట సమితి వ్యవస్థాపక అధ్యక్షులు పద్మశ్రీ మందకృష్ణ మాదిగ నాయకత్వంలో, దివ్యాంగులందరూ కలిసి రాష్ట్రంలో పెద్ద ఎత్తున ధర్నాలు చేస్తామని, ప్రతి జిల్లా కలెక్టరేట్ కార్యాలయాలను ముట్టడి చేసి తమ హక్కులను నిలబెట్టుకుంటామని తెలిపారు. ప్రభుత్వాన్ని దిగివచ్చే వరకు నిరాహార దీక్షలు చేపడతామని హెచ్చరించారు.
