సంగారెడ్డి జిల్లా నాగలిగిద్ద మండల పరిషత్ అభివృద్ధి అధికారిణి (ఎంపీడీవో) కుమారి స్పందన దుర్గ, ఎంపీపీలను జిల్లా యంత్రాంగం సస్పెండ్ చేసింది. అధికారిక తెలంగాణ ఆవిర్భావ దినోత్సవ వేడుకలకు ముందస్తు అనుమతి లేకుండా గైర్హాజరైనందుకు ఈ చర్యలు తీసుకున్నారు.
జూన్ 2న జరిగిన తెలంగాణ ఆవిర్భావ దినోత్సవ వేడుకలకు హాజరుకావాల్సి ఉండగా, ఉన్నతాధికారుల అనుమతి తీసుకోకుండా ఎంపీడీవో, ఎంపీపీ గైర్హాజరైనట్లు సమాచారం. ఈ విషయం జిల్లా యంత్రాంగం దృష్టికి రావడంతో, వారిపై క్రమశిక్షణా చర్యలు ప్రారంభించారు.
ప్రభుత్వ ఉద్యోగుల ప్రవర్తనా నియమావళి ప్రకారం, అధికారిక కార్యక్రమాలకు అనుమతి లేకుండా గైర్హాజరు కావడం తీవ్రమైన నిర్లక్ష్యంగా, ప్రభుత్వ ఉద్యోగికి తగని ప్రవర్తనగా పరిగణించబడుతుందని అధికారులు తెలిపారు.
పరిశీలన అనంతరం, తెలంగాణ సివిల్ సర్వీస్ (సీసీఏ) నియమావళి, 1991లోని నిబంధనల ప్రకారం ఎంపీడీవో, ఎంపీపీలను తక్షణమే సస్పెండ్ చేస్తూ ఉత్తర్వులు జారీ చేశారు. ఈ ఉత్తర్వులు వెంటనే అమల్లోకి వస్తాయి.
