2026–27 సెన్సస్ తొలి దశ గృహ జాబితా, గృహ గణనపై జిల్లా, సబ్ డివిజన్, ఛార్జ్ స్థాయి అధికారులకు అదనపు కలెక్టర్ వి. విక్టర్ శిక్షణ ఇచ్చారు. మే 11 నుంచి రాష్ట్రవ్యాప్తంగా గృహ జాబితా కార్యక్రమం ప్రారంభం కానుంది.
జనాభా గణన ప్రక్రియను సమర్థవంతంగా నిర్వహించాలని కామారెడ్డి అదనపు కలెక్టర్ వి. విక్టర్ అధికారులను ఆదేశించారు. 2026–27 సెన్సస్ తొలి దశ గృహ జాబితా, గృహ గణన (హౌస్ లిస్టింగ్ ఆపరేషన్ – HLO) నిర్వహణపై జిల్లా, సబ్ డివిజన్, ఛార్జ్ స్థాయి అధికారులకు ఆదివారం కలెక్టరేట్ సమావేశ మందిరంలో శిక్షణా కార్యక్రమం నిర్వహించారు.
తెలంగాణ సెన్సస్ ఆపరేషన్స్ డైరెక్టర్ సూచనల మేరకు రాష్ట్రవ్యాప్తంగా గృహ జాబితా, గృహ గణన కార్యక్రమం 2026 మే 11 నుంచి ప్రారంభం కానున్న నేపథ్యంలో, ఎన్యూమరేటర్లు, సూపర్వైజర్లకు శిక్షణ ఇచ్చే ముందు జిల్లా, ఉపజిల్లా అధికారులు, ఛార్జ్ అధికారులకు అదనపు కలెక్టర్ మార్గనిర్దేశం చేశారు.
జిల్లా, సబ్ డివిజనల్ అధికారులు, ఛార్జ్ అధికారులకు లెవల్–1 శిక్షణా కార్యక్రమం మార్చి 15 నుంచి 17 వరకు మూడు రోజులపాటు ఐడీఓసీ సమావేశ మందిరంలో నిర్వహించనున్నట్లు తెలిపారు. ప్రతి రోజు ఉదయం 9.30 గంటల నుంచి సాయంత్రం 6 గంటల వరకు శిక్షణ కొనసాగుతుందని చెప్పారు.
అదనపు కలెక్టర్ విక్టర్ మాట్లాడుతూ, ప్రభుత్వం అమలు చేసే సంక్షేమ పథకాలు, మౌలిక వసతుల ప్రణాళికల రూపకల్పనకు ఖచ్చితమైన జనగణన గణాంకాలు కీలక పునాదిగా ఉంటాయని పేర్కొన్నారు. జనాభా గణనను సాంకేతిక పరిజ్ఞానంతో డిజిటల్ విధానంలో పారదర్శకంగా నిర్వహించనున్నట్లు తెలిపారు. మొత్తం 33 అంశాలపై సమగ్ర సమాచారం సేకరించబడుతుందని, మొదటి దశలో గృహాలు, భవనాలు, కుటుంబ వివరాలు, రెండో దశలో వ్యక్తిగత వివరాలు నమోదు చేయనున్నట్లు వివరించారు.
