ఖమ్మం నగరానికి చెందిన 72 ఏళ్ల మహబూబ్బీ, 40 సంవత్సరాలుగా కట్టెల పొయ్యిపైనే అట్లు తయారు చేస్తూ, విక్రయిస్తూ తన కుటుంబాన్ని పోషిస్తున్నారు. ఆమె జీవితం శ్రమకు నిలువెత్తు నిదర్శనంగా నిలుస్తోంది.
మహబూబ్బీ, రహీమ్ దంపతులకు ఐదుగురు సంతానం. భర్త మరణానంతరం, కుటుంబ బాధ్యతలను తన భుజాలపై వేసుకున్న మహబూబ్బీ, కట్టెల పొయ్యిపైనే అట్లు తయారు చేస్తూ జీవనం సాగిస్తున్నారు.
గతంలో భర్తతో కలిసి చిన్న హోటల్ నిర్వహించిన ఆమె, ఇప్పుడు భక్తరామదాసు కళాక్షేత్రం ఎదుట ఒక చిన్న ఫలహారశాల నడుపుతున్నారు. ప్రతిరోజూ తెల్లవారుజామున 4 గంటలకు లేచి, అట్ల తయారీకి అవసరమైన పదార్థాలను సిద్ధం చేసుకుంటారు.
ఉదయం 6 గంటలకు విక్రయశాల వద్దకు చేరుకుని, మధ్యాహ్నం 12 గంటల వరకు అట్లు పోస్తుంటారు. సాయంత్రం నుంచే మరుసటి రోజుకు కావాల్సిన పదార్థాల తయారీలో నిమగ్నమవుతారు. ఆమె నిబద్ధత, శ్రమ ఎందరికో ఆదర్శం.
ఇన్నేళ్లుగా కట్టెల పొయ్యిపై వంట చేస్తున్నప్పటికీ, మహబూబ్బీకి ఎటువంటి ఆరోగ్య సమస్యలు లేవని ఆమె తెలిపారు. ప్రపంచ ఆరోగ్య దినోత్సవం సందర్భంగా ఆమె స్ఫూర్తిదాయక ప్రస్థానం ప్రత్యేకంగా నిలుస్తుంది.
