రికార్డు అసిస్టెంట్లకు జీపీవో ప్రమోషన్లలో సమాన అవకాశాలు కల్పించాలి: మెట్టు రవీందర్

ప్రభుత్వం జారీ చేసిన జీవో 74 ప్రకారం, కేవలం జూనియర్ అసిస్టెంట్ స్కేలు జీతం పొందుతున్న జీపీవోలకు మాత్రమే ప్రమోషన్లు లభిస్తున్నాయి. దీనిపై రికార్డు అసిస్టెంట్ల సంఘం అభ్యంతరం వ్యక్తం చేసింది. రికార్డు అసిస్టెంట్లు, ఆఫీస్ సబార్డినేట్లుగా పనిచేస్తూ జీపీవోలుగా బాధ్యతలు నిర్వర్తిస్తున్న వారికి కూడా ప్రమోషన్లలో సమాన అవకాశాలు కల్పించాలని సంఘం రాష్ట్ర అధ్యక్షులు మెట్టు రవీందర్ కోరారు.

ఇది ఉద్యోగుల న్యాయమైన హక్కు అని, ప్రభుత్వం తక్షణమే ఈ అంశంపై సానుకూల నిర్ణయం తీసుకోవాలని ఆయన ప్రభుత్వాన్ని విజ్ఞప్తి చేశారు. అర్హులైన ఉద్యోగులందరికీ ప్రమోషన్లు అందేలా చర్యలు తీసుకోవాలని ఆయన కోరారు.

అంతేకాకుండా, జీపీవోలకు వారి సొంత నియోజకవర్గంలో కాకుండా పక్క నియోజకవర్గంలో డ్యూటీ చేయాలనే నిబంధన వల్ల అనేక మంది ఉద్యోగులు ఇబ్బందులు ఎదుర్కొంటున్నారని రవీందర్ తెలిపారు. వారికి అందుబాటులో ఉన్న మండలాలలో ఉద్యోగాలు చేసుకునే విధంగా వెసులుబాటు కల్పించాలని ఆయన ప్రభుత్వానికి సూచించారు.

ప్రభుత్వం తక్షణమే స్పందించి, ఉద్యోగుల సమస్యలను పరిష్కరించి, న్యాయం చేయాలని రికార్డు అసిస్టెంట్లు కోరుతున్నారు. ఈ విషయంలో ప్రభుత్వం సానుకూల నిర్ణయం తీసుకుంటుందని ఆశిస్తున్నామని వారు తెలిపారు.