తెలంగాణ బడ్జెట్‌లో బీసీలకు అన్యాయం: రాజ్యాధికార పార్టీ నిరసనలకు పిలుపు

తెలంగాణ రాజ్యాధికార పార్టీ నాయకులు మాట్లాడుతూ, ప్రభుత్వం బీసీలకు ప్రతి ఏటా ₹20,000 కోట్లు కేటాయిస్తామని హామీ ఇచ్చి, ఈసారి కేవలం ₹12,000 కోట్లతో సరిపెట్టడం దారుణమని పేర్కొన్నారు. బీసీ సబ్ ప్లాన్ ఏర్పాటు చేస్తామని చెప్పి, దానిని అమలు చేయకపోవడం ప్రభుత్వ నిర్లక్ష్యానికి నిదర్శనమని విమర్శించారు.

రాష్ట్ర జనాభాలో 60 శాతం వాటా కలిగిన బీసీలకు బడ్జెట్‌లో కేవలం 6 శాతం నిధులు మాత్రమే కేటాయించారని, మరోవైపు 10 శాతం కూడా లేని ఓసీ మంత్రుల ఆధీనంలో 62 శాతం బడ్జెట్ ఉండటం సామాజిక న్యాయానికి విరుద్ధమని పార్టీ ప్రశ్నించింది.

ఈ నేపథ్యంలో, బీసీలకు జరుగుతున్న అన్యాయానికి నిరసనగా తెలంగాణ రాజ్యాధికార పార్టీ రాష్ట్రవ్యాప్తంగా అన్ని జిల్లా, మండల కేంద్రాల్లో రేపు ఉదయం 10 గంటలకు నల్ల బ్యాడ్జీలతో నిరసన కార్యక్రమాన్ని చేపడుతున్నట్లు ప్రకటించింది. ఈ నిరసనల్లో పార్టీ నాయకులు, కార్యకర్తలు, శ్రేణులందరూ అధిక సంఖ్యలో పాల్గొని ప్రభుత్వానికి తమ వ్యతిరేకతను తెలియజేయాలని పిలుపునిచ్చింది.