తెలంగాణ అసెంబ్లీలో భూ కేటాయింపులపై తీవ్ర దుమారం రేగింది. ఖైరతాబాద్ ఎమ్మెల్యే దానం నాగేందర్, వరంగల్ పశ్చిమ ఎమ్మెల్యే నాయిని రాజేందర్రెడ్డి, మాజీ మంత్రి కడియం శ్రీహరి వంటి పలువురు ఎమ్మెల్యేలు గత ప్రభుత్వ హయాంలో జరిగిన భూ అక్రమాలపై విరుచుకుపడ్డారు. ఈ అక్రమాలను వెలికితీయడానికి తక్షణమే హౌస్ కమిటీ వేయాలని డిమాండ్ చేశారు.
ఖైరతాబాద్ ఎమ్మెల్యే దానం నాగేందర్ తన సొంత భూమిని ఒక ప్రైవేట్ కంపెనీకి కట్టబెట్టారని, అప్పట్లో తాను ఏమీ చేయలేకపోయానని ఆవేదన వ్యక్తం చేశారు. భూ బదలాయింపుల్లో జరిగిన అక్రమాలకు సంబంధించిన ఆధారాలు తన వద్ద ఉన్నాయని, ప్రభుత్వం కోరితే సమర్పించడానికి సిద్ధంగా ఉన్నానని ఆయన తెలిపారు. భూ అక్రమాలపై హౌస్ కమిటీ వేయాలని ఆయన డిమాండ్ చేశారు.
వరంగల్ పశ్చిమ ఎమ్మెల్యే నాయిని రాజేందర్రెడ్డి మాట్లాడుతూ, హన్మకొండలో సుమారు రూ.200 కోట్ల విలువైన ప్రభుత్వ భూమిని బీఆర్ఎస్ పార్టీ ఆఫీస్ పేరుతో అక్రమంగా దక్కించుకున్నారని ఆరోపించారు. ఇది అధికార దుర్వినియోగానికి పరాకాష్ట అని, తన ఆరోపణలు నిరూపించకుంటే 48 గంటల్లో పదవికి రాజీనామా చేస్తానని సవాల్ విసిరారు. బీఆర్ఎస్ పార్టీ ఆఫీస్ భూ దోపిడీపై హౌస్ కమిటీ వేయాలని ఆయన కోరారు.
మాజీ మంత్రి, ఎమ్మెల్యే కడియం శ్రీహరి మాట్లాడుతూ, గత పదేళ్ల కాలంలో జరిగిన భూ కేటాయింపుల్లో భారీ అక్రమాలు జరిగాయని, లక్షల ఎకరాల ప్రభుత్వ భూములను దోచుకున్నారని ఆరోపించారు. అప్పట్లో అధికారాన్ని అడ్డం పెట్టుకొని కంపెనీల యజమానులను బెదిరించి, వారి వద్ద ఉన్న విలువైన భూములను బలవంతంగా బదలాయించుకున్నారని, ఇది వ్యవస్థీకృత దోపిడీ అని అన్నారు. బాలానగర్ ప్రాంతంలో జరిగిన భూ అక్రమాలపై ప్రత్యేకంగా దృష్టి సారించాలని ఆయన సూచించారు.
సమావేశాల్లో బీఆర్ఎస్ ఎమ్మెల్యేలు పోడియం వద్దకు దూసుకెళ్లి నినాదాలు చేయడంతో కొంతసేపు గందరగోళం నెలకొంది. భూ కేటాయింపులపై అధికార పక్షం, ప్రతిపక్షాల మధ్య తీవ్రస్థాయిలో చర్చలు జరిగాయి.
