నిజామాబాద్, July 20
న్యూఢిల్లీ జంతర్మంతర్ వద్ద సీజేపీ ఆధ్వర్యంలో నిరాహార దీక్షలు చేపడుతున్న విద్యార్థులు, నిరుద్యోగులపై కేంద్ర ప్రభుత్వం అనుసరిస్తున్న నిర్బంధ వైఖరిని పీడీఎస్యూ జిల్లా ప్రధాన కార్యదర్శి జన్నారపు రాజేశ్వర్ తీవ్రంగా ఖండించారు. పార్లమెంట్ సమావేశాల సందర్భంగా జరిగిన శాంతియుత నిరసన ప్రదర్శనపై పోలీసులు లాఠీచార్జి, వాటర్ క్యానన్లను ప్రయోగించడాన్ని ఆయన విమర్శించారు.
న్యూఢిల్లీ జంతర్మంతర్ వద్ద సీజేపీ ఆధ్వర్యంలో గత 22 రోజులుగా నిరాహార దీక్షలు చేపడుతున్న విద్యార్థులు, నిరుద్యోగులపై కేంద్ర ప్రభుత్వం నిర్బంధ వైఖరిని అవలంబించడం ప్రజాస్వామ్యానికి విరుద్ధమని పీడీఎస్యూ జిల్లా ప్రధాన కార్యదర్శి జన్నారపు రాజేశ్వర్ విమర్శించారు.
సోమవారం ఆయన విడుదల చేసిన ప్రకటనలో, పార్లమెంట్ సమావేశాల సందర్భంగా నిర్వహించిన శాంతియుత నిరసన ప్రదర్శనపై పోలీసులు లాఠీచార్జి చేయడంతో పాటు వాటర్ క్యానన్లను ప్రయోగించడం తీవ్రంగా ఖండిస్తున్నామని తెలిపారు.
నీట్ పరీక్ష ప్రశ్నాపత్రాల లీకేజీ కారణంగా లక్షలాది మంది విద్యార్థులు, వారి కుటుంబాలు తీవ్ర ఇబ్బందులు ఎదుర్కొన్నాయని పేర్కొన్నారు. ఈ ఘటనల నేపథ్యంలో ప్రాణాలు కోల్పోయిన విద్యార్థుల కుటుంబాలకు రూ.కోటి చొప్పున పరిహారం అందించాలని డిమాండ్ చేశారు. అలాగే కేంద్ర విద్యాశాఖ మంత్రి ధర్మేంద్ర ప్రధాన్ వెంటనే తన పదవికి రాజీనామా చేయాలని కోరారు.
శాంతియుతంగా నిర్వహించిన పార్లమెంట్ నిరసన ర్యాలీలో విద్యార్థులపై పోలీసులు అమానుషంగా వ్యవహరించడం ప్రజాస్వామ్య విలువలపై దాడితో సమానమని అన్నారు. అరెస్టు చేసిన అభిజిత్ దీప్కేతో పాటు అదుపులోకి తీసుకున్న వేలాది మంది విద్యార్థులను తక్షణమే విడుదల చేయాలని కేంద్ర ప్రభుత్వాన్ని డిమాండ్ చేశారు.
