నాగారం మున్సిపాలిటీలో ఘనంగా శ్రీరామనవమి వేడుకలు: సీతారాముల కళ్యాణం కన్నుల పండువ

వివిధ కాలనీ అసోసియేషన్ల ఆధ్వర్యంలో జరిగిన ఈ వేడుకలకు నాగారం మాజీ చైర్మన్ చంద్రారెడ్డి ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ, సీతారాముల కళ్యాణాన్ని దర్శించడం ఎంతో పుణ్యప్రదమని, శ్రీరాముని కృపతో ప్రజలందరూ సుఖశాంతులతో జీవించాలని ఆకాంక్షించారు.

కాలనీలలో భక్తి భావాన్ని పెంపొందించేలా ఇలాంటి కార్యక్రమాలు నిర్వహించడం అభినందనీయమని చంద్రారెడ్డి అన్నారు. లోకక్షేమార్థం ప్రత్యేక పూజలు నిర్వహించి, అందరి సంక్షేమాన్ని కోరారు. ఈ వేడుకల్లో మాజీ కౌన్సిలర్ శ్రీనివాస్ గౌడ్, నాయకులు అనంతరెడ్డి, మెరుగు శ్రీనివాస్ రెడ్డి, యువ నేత కకుట్ల రాహుల్ రెడ్డి తదితరులు పాల్గొన్నారు.

కళ్యాణ మహోత్సవాలకు మహిళలు, భక్తులు, కాలనీవాసులు పెద్ద సంఖ్యలో తరలివచ్చారు. కార్యక్రమం అనంతరం భక్తులకు తీర్థప్రసాదాలు పంపిణీ చేశారు. అన్నదాన కార్యక్రమాలు కూడా నిర్వహించడం జరిగింది.

శ్రీరామనవమి వేడుకల సంబరాల్లో భాగంగా 'జై శ్రీరామ్' నినాదాలతో నాగారం ప్రాంతం ఆధ్యాత్మిక వాతావరణంతో నిండిపోయింది. పండుగ శోభతో ఆ ప్రాంతం సందడిగా మారింది.