ఫార్మాసిటీ కోసం భూసేకరణ, మూసీ సుందరీకరణ ప్రాజెక్టుపై రాష్ట్ర ప్రభుత్వాన్ని మాజీ మంత్రి కేటీఆర్ తీవ్రంగా విమర్శించారు. ప్రభుత్వ వాదనలను ఆయన ప్రశ్నించారు.
ఫార్మాసిటీ కోసం ఇప్పటికే 14 వేల ఎకరాలు సేకరించినట్లు తెలిపారు. అయితే, భవిష్యత్ నగరానికి 30 వేల ఎకరాలు అవసరమని ప్రభుత్వం చెబుతుండగా, మిగిలిన 16 వేల ఎకరాలను ఎలా సేకరిస్తారని కేటీఆర్ ప్రశ్నించారు. ఫార్మాసిటీ కోసం భూములు ఇచ్చిన రైతులకు ప్రభుత్వం స్పష్టత ఇవ్వాలని ఆయన కోరారు.
మూసీ సుందరీకరణకు లక్షన్నర కోట్లు ఖర్చు చేస్తామంటున్న సీఎం రేవంత్ రెడ్డి వ్యాఖ్యలను కేటీఆర్ ప్రస్తావించారు. మంత్రి శ్రీధర్ బాబు డీపీఆర్ లేకుండానే 3297 ఎకరాల గురించి మాట్లాడటం, లక్షా యాభై వేల కోట్ల భూములను కొల్లగొట్టడానికే మూసీ ప్రాజెక్టును ప్రతిపాదిస్తున్నారనడానికి నిదర్శనమని ఆయన ఆరోపించారు.
తాము దోపిడీని వ్యతిరేకిస్తున్నామని, మూసీ పునరుజ్జీవానికి కాదని కేటీఆర్ స్పష్టం చేశారు. మూసీకి గోదావరి జలాలు తీసుకురావడం, ఎస్టీపీలు నిర్మించడం, డబుల్ బెడ్ రూం ఇళ్లు కట్టడం, మూసీ పునరుజ్జీవం ప్రారంభించడం వంటి పనులన్నీ తామే చేశామని ఆయన గుర్తు చేశారు.
ప్రభుత్వం ఎన్ని చెప్పినా, తాము చేసిన అభివృద్ధి పనులను ప్రజలు గమనిస్తున్నారని కేటీఆర్ అన్నారు. ఈ ఆరోపణలపై ప్రభుత్వ వర్గాల నుంచి స్పందన రావాల్సి ఉంది.
