బాన్సువాడ ఎమ్మెల్యే పోచారం శ్రీనివాస్ రెడ్డి, రాష్ట్రంలో కాంగ్రెస్ ప్రభుత్వంపై తీవ్ర అసంతృప్తి వ్యక్తం చేశారు. సిద్దాపూర్ రిజర్వాయర్ పనులకు నిధులు మంజూరు చేయడంలో జరుగుతున్న జాప్యంపై ఆయన ప్రభుత్వ తీరును తప్పుబట్టారు.
నిధుల మంజూరు విషయంలో మంత్రి 20 సార్లు చెప్పినా పట్టించుకోలేదని, ఈ వయసులో మంత్రుల కాళ్లు మొక్కాల్సిన పరిస్థితి వచ్చిందని పోచారం ఆవేదన వ్యక్తం చేశారు. గత బీఆర్ఎస్ ప్రభుత్వ హయాంతో పోలిస్తే, ప్రస్తుత ప్రభుత్వంలో పరిస్థితులు దారుణంగా ఉన్నాయని ఆయన విమర్శించారు.
ఎమ్మెల్యేల ఫోన్లను కూడా మంత్రులు లేపడం లేదని, ప్రభుత్వం పనిచేస్తుందా అనే అనుమానం కలుగుతోందని పోచారం అన్నారు. ముఖ్యమంత్రి రేవంత్ రెడ్డి ఇచ్చిన మాట తప్పారని, నియోజకవర్గ అభివృద్ధికి నిధులు అందడం లేదని ఆయన ఆరోపించారు.
సిద్దాపూర్ రిజర్వాయర్ పనులకు నిధులు మంజూరు చేయకపోవడంపై ఆయన నిరసన తెలిపారు. ఈ అంశంపై తాను పలుమార్లు ప్రభుత్వాన్ని సంప్రదించినా స్పందన లేదని పేర్కొన్నారు.
పోచారం వ్యాఖ్యలు అధికార పార్టీలో కలకలం రేపాయి. సొంత ప్రభుత్వానికే ఎమ్మెల్యే బహిరంగంగా అసంతృప్తి వ్యక్తం చేయడం రాజకీయంగా ప్రాధాన్యత సంతరించుకుంది.
