ఆంధ్రప్రదేశ్లో సాగు చేస్తున్న రైతులకు రాష్ట్ర ప్రభుత్వం శుభవార్త అందించింది. పెండింగ్లో ఉన్న 46,113 వ్యవసాయ విద్యుత్ కనెక్షన్లకు గ్రీన్ సిగ్నల్ ఇస్తూ, ఈ నెలాఖరులోగా అనుమతులు జారీ చేయాలని ఆదేశాలు జారీ చేసింది.
రాష్ట్ర విద్యుత్ శాఖ మంత్రి ఇటీవల డిస్కం అధికారులతో నిర్వహించిన సమీక్షలో, పెండింగ్లో ఉన్న వ్యవసాయ విద్యుత్ కనెక్షన్లను రెండు నెలల్లోగా పూర్తి చేయాలని ఆదేశించారు. ఈ నిర్ణయంతో వేలాది మంది రైతులకు సాగు సీజన్కు ముందే విద్యుత్ సౌకర్యం అందుబాటులోకి రానుంది.
ప్రభుత్వ గణాంకాల ప్రకారం, రాష్ట్రంలో మొత్తం 22.30 లక్షల వ్యవసాయ కనెక్షన్లు ఉండగా, ఇప్పటివరకు 1.12 లక్షల కొత్త కనెక్షన్లు మంజూరు చేయబడ్డాయి. మిగిలిన 46,113 దరఖాస్తులు పెండింగ్లో ఉన్నాయి. ఈ పెండింగ్ను క్లియర్ చేయడానికి దాదాపు రూ.250 కోట్లు ఖర్చవుతుందని అంచనా వేస్తున్నారు.
పెండింగ్ కనెక్షన్ల మంజూరు ప్రక్రియలో భాగంగా, విద్యుత్ సరఫరాకు అవసరమైన ట్రాన్స్ఫార్మర్ల కొరతను కూడా గుర్తించారు. ఈ ప్రక్రియను పూర్తి చేయడానికి అదనంగా మరో 10,000 ట్రాన్స్ఫార్మర్లు అవసరమవుతాయని అధికారులు తెలిపారు. ఈ అంశంపై ప్రభుత్వం పరిశీలన చేస్తున్నట్లు సమాచారం.
