కామారెడ్డి జిల్లా కలెక్టర్ ఆశిష్ సాంగ్వాన్ ఐపీఎస్ బుధవారం రాజీవ్ నగర్ పట్టణ ప్రాథమిక ఆరోగ్య కేంద్రాన్ని ఆకస్మికంగా తనిఖీ చేసి, వైద్య సేవల నిర్వహణపై సమగ్ర సమీక్ష నిర్వహించారు.
ఆసుపత్రిలో రోగులకు అందుతున్న వైద్య సేవల నాణ్యత, ఔషధాల లభ్యత, సౌకర్యాలు, సిబ్బంది హాజరు వంటి అంశాలను కలెక్టర్ క్షుణ్ణంగా పరిశీలించారు. ఆసుపత్రి ప్రాంగణంలో పరిశుభ్రత, వైద్యుల సమయపాలన, రోగుల పట్ల వ్యవహారశైలిపై ప్రత్యేకంగా దృష్టి సారించారు.
మెరుగైన వైద్య సేవలు అందించడానికి తక్షణ చర్యలు తీసుకోవాలని అధికారులను ఆదేశించిన కలెక్టర్, ప్రభుత్వ ఆరోగ్య సేవలను ప్రజలు సద్వినియోగం చేసుకునేలా అవగాహన కార్యక్రమాలు చేపట్టాలని సూచించారు.
ఈ తనిఖీలో వైద్యాధికారి సాయి ఈశ్వరి, ఇతర వైద్య సిబ్బంది పాల్గొన్నారు. కలెక్టర్ ఆకస్మిక పర్యటనతో ఆరోగ్య కేంద్రంలో కార్యకలాపాలు చురుగ్గా సాగాయి.
