ప్రపంచ పర్యావరణ దినోత్సవాన్ని పురస్కరించుకుని, పర్యావరణ పరిరక్షణపై అవగాహన కల్పించేందుకు రూపొందించిన పోస్టర్లను సంగారెడ్డి జిల్లా కలెక్టరేట్లో అదనపు కలెక్టర్లు టి.ఎల్. సంగీత, పాండు ఆవిష్కరించారు. సింగిల్ యూజ్ ప్లాస్టిక్కు ప్రత్యామ్నాయాలు, ఘన వ్యర్థాల వేర్పాటుపై ఈ పోస్టర్లు దృష్టి సారిస్తున్నాయి.
పర్యావరణ పరిరక్షణ ప్రతి ఒక్కరి సామాజిక బాధ్యత అని అదనపు కలెక్టర్లు ఈ సందర్భంగా పేర్కొన్నారు. పర్యావరణ పరిరక్షణలో ప్రజల పాత్ర కీలకమని వారు తెలిపారు.
సింగిల్ యూజ్ ప్లాస్టిక్ వాడకాన్ని తగ్గించి, వస్త్ర సంచులు, కాగితం సంచులు వంటి పర్యావరణ హిత ప్రత్యామ్నాయాలను ఉపయోగించాలని వారు ప్రజలకు సూచించారు. ప్లాస్టిక్ వల్ల కలిగే నష్టాలను వివరించారు.
వ్యర్థాల నిర్వహణ, పరిశుభ్రతపై ప్రతి కుటుంబం అవగాహన పెంచుకోవాలని, ఆచరణలో పెట్టాలని వారు పిలుపునిచ్చారు. శాస్త్రీయ పద్ధతుల్లో వ్యర్థాలను వేరు చేయడం వల్ల పర్యావరణానికి మేలు జరుగుతుందని తెలిపారు.
ఈ కార్యక్రమంలో తెలంగాణ కాలుష్య నియంత్రణ మండలి ఈఈ ఎన్. విజయలక్ష్మి, కలెక్టరేట్ ఏఓతో పాటు పలువురు అధికారులు పాల్గొన్నారు. పర్యావరణ పరిరక్షణ ఆవశ్యకతను తెలియజేసేలా పోస్టర్లను ప్రదర్శించారు.
