కామారెడ్డి జిల్లా కేంద్రంలో "మీ బంగారు భవిష్యత్తుకు దిక్సూచి" పేరుతో నిర్వహించిన కెరీర్ గైడెన్స్ కార్యక్రమం యువతకు భవిష్యత్ అవకాశాలపై అవగాహన కల్పించింది.
జిల్లా గ్రంథాలయ సంస్థ చైర్మన్ మద్ది చంద్రకాంత్ రెడ్డి మాట్లాడుతూ, రాబోయే పోటీ పరీక్షలకు సిద్ధమవ్వడంలో పయనీర్ అకాడమీ, జిల్లా గ్రంథాలయం విద్యార్థులకు ఉపయోగకరంగా ఉంటాయని తెలిపారు. ఉద్యోగాల జాతర రాబోతోందని, జిల్లా యువత ఉద్యోగాలు సాధించి మంచి పేరు తేవాలని ఆకాంక్షించారు.
పెద్ద నగరాలకు వెళ్లకుండా స్థానికంగా లభించే అవకాశాలను సద్వినియోగం చేసుకోవాలని సూచించారు. భవిష్యత్తులో జిల్లా గ్రంథాలయాన్ని విస్తరించి, విద్యార్థులకు మరిన్ని సౌకర్యాలు కల్పిస్తామని ఆయన హామీ ఇచ్చారు.
ఆర్.కే గ్రూప్ ఆఫ్ కాలేజెస్ సీఈవో డా. ఎం. జైపాల్ రెడ్డి, పయనీర్ అకాడమీ డైరెక్టర్ సందీప్ గౌడ్ మాట్లాడుతూ, పోటీ పరీక్షలకు సిద్ధమవుతున్న విద్యార్థులు ఇలాంటి అవకాశాలను పూర్తిగా వినియోగించుకోవాలని పిలుపునిచ్చారు. అకాడమీ అనుభవజ్ఞులైన అధ్యాపకులు, ర్యాంకర్ల మార్గదర్శకత్వంలో నడుస్తోందని, యువత ఉన్నత శిఖరాలు అధిరోహించాలని ఆకాంక్షించారు.
ఈ కార్యక్రమంలో జిల్లా గ్రంథాలయ సంస్థ చైర్మన్, ఆర్కె గ్రూప్ సీఈవో, పయనీర్ అకాడమీ డైరెక్టర్, పలువురు అధ్యాపకులు, విద్యార్థులు పాల్గొన్నారు. రాబోయే ఉద్యోగ అవకాశాలపై విద్యార్థులు ప్రత్యేక శ్రద్ధ చూపాలని సూచించారు.
