కొత్త విద్యా సంవత్సరం ప్రారంభమైన నేపథ్యంలో, జిల్లాలోని కొన్ని ప్రైవేట్ విద్యాసంస్థలు నిబంధనలను ఉల్లంఘిస్తూ విద్యను వ్యాపారంగా మార్చుతున్నాయని అఖిల భారత ప్రజాతంత్ర విద్యార్థి సమాఖ్య (ఏఐఎఫ్డీఎస్) రాష్ట్ర కార్యదర్శి జబ్బర్ ఆరోపించారు. ప్రభుత్వ నిబంధనలు, విద్యాశాఖ మార్గదర్శకాలను తుంగలో తొక్కుతూ అడ్మిషన్ల పేరుతో తల్లిదండ్రులపై ఆర్థిక భారం మోపుతున్నాయని ఆయన విమర్శించారు.
జిల్లాలోని అనేక ప్రైవేట్ విద్యాసంస్థలు కనీస మౌలిక వసతులు లేకుండానే కొనసాగుతున్నాయని, విద్యార్థుల భద్రతను విస్మరిస్తున్నాయని జబ్బర్ పేర్కొన్నారు. ఇరుకైన గదులు, సరైన గాలి, వెలుతురు సదుపాయాలు లేని భవనాల్లో పాఠశాలలను నిర్వహిస్తున్నప్పటికీ, సంబంధిత అధికారులు పర్యవేక్షణలో విఫలమవుతున్నారని ఆయన అన్నారు.
ప్రభుత్వ నిబంధనల ప్రకారం ప్రతి పాఠశాలకు ఉండాల్సిన ఆటస్థలాలు, భద్రతా ప్రమాణాలు, అత్యవసర పరిస్థితులను ఎదుర్కొనే అగ్నిమాపక సదుపాయాలు చాలా చోట్ల లేకపోయినా అధికారులు చర్యలు తీసుకోవడం లేదని విమర్శించారు. అగ్నిమాపక శాఖ అనుమతులు లేకుండా విద్యాసంస్థలు కొనసాగుతున్నప్పటికీ సంబంధిత శాఖలు స్పందించకపోవడం ఆందోళన కలిగిస్తోందని తెలిపారు.
విద్యార్థుల రవాణా కోసం ఉపయోగిస్తున్న పాఠశాల బస్సుల పరిస్థితి కూడా ఆందోళనకరంగా ఉందని జబ్బర్ తెలిపారు. ఫిట్నెస్ సర్టిఫికెట్లు లేని వాహనాలు, తగిన అనుభవం లేని డ్రైవర్లతో బస్సులు నడుస్తున్నాయని, దీంతో విద్యార్థుల ప్రాణాలు ప్రమాదంలో పడుతున్నాయని ఆయన పేర్కొన్నారు. పాఠ్యపుస్తకాలు, స్టేషనరీ వస్తువులను పాఠశాలలే విక్రయిస్తూ విద్యను పూర్తిగా వ్యాపారీకరించారని ఆయన ఆవేదన వ్యక్తం చేశారు.
ఫీజుల నియంత్రణ చట్టాన్ని అమలు చేయడంలో విద్యాశాఖ అధికారులు నిర్లక్ష్యంగా వ్యవహరిస్తున్నారని, నిబంధనలు ఉల్లంఘిస్తున్న విద్యాసంస్థలపై వెంటనే సమగ్ర తనిఖీలు నిర్వహించి కఠిన చర్యలు తీసుకోవాలని డిమాండ్ చేశారు. లేనిపక్షంలో ఏఐఎఫ్డీఎస్ ఆధ్వర్యంలో విద్యార్థులు, తల్లిదండ్రులతో కలిసి ఆందోళనలు, ఉద్యమాలు చేపట్టి విద్యార్థుల హక్కుల పరిరక్షణ కోసం పోరాటం ఉధృతం చేస్తామని జబ్బర్ హెచ్చరించారు.
