మహాత్మ జ్యోతిరావు పూలే ఆశయాలను స్మరించుకోవాలి: సామాజికవేత్త ఎం. శ్రీనివాస్ కుమార్

మహాత్మ జ్యోతిరావు పూలే భారత తొలి సంఘ సంస్కర్తగా, సామాజికవేత్తగా సమాజ అభివృద్ధికి తన జీవితాన్ని త్యాగం చేశారని శ్రీనివాస్ కుమార్ తెలిపారు. సత్యశోధన సంస్థ ద్వారా సమాజంలోని రుగ్మతలను నిర్మూలించడానికి ఆయన కృషి చేశారని ఆయన పేర్కొన్నారు.

విజ్ఞానం అంటే సత్యాన్ని, అసత్యాన్ని సరిగ్గా తెలుసుకోవడమేనని పూలే విశ్వసించారని, విద్య ద్వారానే వ్యక్తిగత, సామాజిక అభివృద్ధి సాధ్యమవుతుందని ఆయన బలంగా నమ్మారని శ్రీనివాస్ కుమార్ వివరించారు. అందుకే ఆయన విద్యావ్యాప్తికి విశేషంగా కృషి చేశారని తెలిపారు.

బాలికల విద్య ఆవశ్యకతను గుర్తించి, తన భార్య సావిత్రిబాయి పూలేను విద్యావంతురాలిగా తీర్చిదిద్ది, ఆమె ద్వారానే బాలికా విద్యకు మార్గం సుగమం చేశారని అన్నారు. భారతదేశంలోనే మొట్టమొదటి బాలికల పాఠశాలను స్థాపించి, అప్పటి సామాజిక పరిస్థితుల్లో ఎంతో ధైర్యంగా ఈ అడుగు వేశారని కొనియాడారు.

నేడు ఆయన జయంతిని జరుపుకుంటున్న సందర్భంగా, ఆయన ఆశయ సాధనకు, సమాజంలోని అంధకారాలను, మూఢవిశ్వాసాలను తొలగించడానికి విద్య ద్వారానే జ్ఞానాన్ని పెంపొందించుకోవాల్సిన ఆవశ్యకత ఉందని శ్రీనివాస్ కుమార్ పిలుపునిచ్చారు.