కరీంగూడ గ్రామంలో శ్రీ ఆంజనేయస్వామి వారి నూతన ఆలయ నిర్మాణానికి గురువారం ఘనంగా శంకుస్థాపన జరిగింది. ఈ కార్యక్రమానికి స్థానిక భక్తులు, ప్రముఖులు పెద్ద సంఖ్యలో హాజరయ్యారు.
శ్రీ శివ పంచాయితన శ్రీ రాధాకృష్ణుల దేవాలయ ప్రాంగణంలో శ్రీ ఆంజనేయస్వామి నూతన ఆలయ నిర్మాణానికి నిర్వహించిన శంకుస్థాపన కార్యక్రమం అత్యంత వైభవంగా జరిగింది. ఈ పవిత్ర కార్యక్రమాన్ని శ్రీ కౌకుట్ల కృష్ణారెడ్డి దంపతులు మరియు కౌకుట్ల జీవన్ రెడ్డి భక్తిశ్రద్ధలతో నిర్వహించారు.
వేద పండితుల మంత్రోచ్ఛారణలు, పూజా కార్యక్రమాల నడుమ శాస్త్రోక్తంగా జరిగిన ఈ శంకుస్థాపన వేడుక ఆధ్యాత్మిక వాతావరణాన్ని సంతరించుకుంది. గ్రామ ప్రజలు, భక్తులు పెద్ద సంఖ్యలో హాజరై స్వామివారి ఆశీస్సులు పొందారు.
శ్రీ ఆంజనేయస్వామి ఆలయ నిర్మాణ బాధ్యతలను పూర్తిగా స్వయంగా స్వీకరించిన కౌకుట్ల కుటుంబ సభ్యులు, ఆలయాన్ని భక్తులకు ఆధ్యాత్మిక కేంద్రంగా తీర్చిదిద్దే సంకల్పంతో ముందుకు సాగుతున్నారు. ప్రస్తుతం దేవాలయ ప్రాంగణంలో నిర్మాణ పనులు శరవేగంగా కొనసాగుతున్నాయని నిర్వాహకులు తెలిపారు.
ఆలయ నిర్మాణం పూర్తయిన అనంతరం ఈ ప్రాంతానికి మరింత ఆధ్యాత్మిక శోభ చేకూరనుండగా, భక్తులకు ప్రత్యేక పూజా కార్యక్రమాలు, ధార్మిక సేవలు అందుబాటులోకి రానున్నాయని వారు పేర్కొన్నారు.
