గంజాయి సేవించిన నలుగురు నిందితులు: 15 రోజుల పాటు పునరావాస కేంద్రానికి తరలింపు

పోలీసులు పట్టణంలో తనిఖీలు నిర్వహిస్తుండగా అనుమానాస్పదంగా కనిపించిన నలుగురిని అదుపులోకి తీసుకున్నారు. విచారణలో వారు గంజాయి సేవించినట్లు అంగీకరించారు. దీంతో వారిని మంచిర్యాల ప్రభుత్వ ఆసుపత్రికి తరలించి వైద్య పరీక్షలు నిర్వహించారు. ఈ పరీక్షల్లో గంజాయి సేవించినట్లు నిర్ధారణ అయింది.

వైద్య నివేదికల ఆధారంగా నిందితులను స్థానిక న్యాయస్థానంలో హాజరుపరిచారు. కేసు వివరాలను పరిశీలించిన న్యాయమూర్తి, నిందితులను 15 రోజుల పాటు డీ-అడిక్షన్ కేంద్రానికి తరలించాలని ఆదేశాలు జారీ చేశారు.

గంజాయి సేవించిన వారిని పట్టుకోవడంలో సమయస్ఫూర్తి చూపిన ఎస్‌ఐ నరేష్, సిబ్బందిని ఉన్నతాధికారులు అభినందించారు. ఇలాంటి అసాంఘిక కార్యకలాపాలకు పాల్పడితే కఠిన చర్యలు తప్పవని పోలీసులు హెచ్చరించారు.