కామారెడ్డి పట్టణంలో రాత్రిపూట ఒంటరిగా వెళ్లేవారిని లక్ష్యంగా చేసుకుని దోపిడీలకు పాల్పడుతున్న ఐదుగురు సభ్యుల ముఠాను పోలీసులు అరెస్ట్ చేశారు. వీరి వద్ద నుంచి నగదు, దుబాయ్ దిర్హమ్స్, ఐఫోన్లు, స్కూటర్తో పాటు ఇతర వస్తువులను స్వాధీనం చేసుకున్నారు. ఈ ముఠాలో ఒక బాల నేరస్తుడు కూడా ఉన్నట్లు పోలీసులు తెలిపారు.
నగదు, విదేశీ కరెన్సీ, ఖరీదైన మొబైల్ ఫోన్లు, స్కూటర్ను స్వాధీనం చేసుకున్నట్లు పోలీసులు తెలిపారు. ఈ కేసును వేగంగా ఛేదించిన పోలీసు సిబ్బందిని ఉన్నతాధికారులు అభినందించారు.
పోలీసులు తెలిపిన వివరాల ప్రకారం, ఈ నెల 18వ తేదీ రాత్రి రాజీవ్నగర్ కాలనీ సమీపంలో ఒంటరిగా ఉన్న వ్యక్తిని ఐదుగురు వ్యక్తులు అడ్డగించి, బెదిరించి దాడి చేసి రూ.4 వేల నగదు, ఆధార్ కార్డు, 300 దుబాయ్ దిర్హమ్స్ దోచుకెళ్లారు. అంతేకాకుండా, బాధితుడి మొబైల్లోని నావీ యాప్ ద్వారా బలవంతంగా రూ.1,000ను యూపీఐ ఖాతాకు బదిలీ చేయించుకున్నట్లు ఫిర్యాదులో పేర్కొన్నారు.
ఫిర్యాదు మేరకు కేసు నమోదు చేసుకున్న పోలీసులు, సీసీ కెమెరా ఫుటేజీలు, సాంకేతిక ఆధారాలు, సాక్షుల వాంగ్మూలాల ఆధారంగా నిందితుల కదలికలను గుర్తించారు. విశ్వసనీయ సమాచారం మేరకు అనుమానాస్పదంగా సంచరిస్తున్న ఐదుగురిని అదుపులోకి తీసుకుని విచారించగా, వారు నేరాన్ని అంగీకరించినట్లు తెలిపారు. తాము సులభంగా డబ్బు సంపాదించాలనే ఉద్దేశంతో ఈ నేరాలకు పాల్పడినట్లు నిందితులు ఒప్పుకున్నారు.
నిందితుల వద్ద నుంచి మొత్తం రూ.8,300 నగదు, ఒక ఐఫోన్-15, పోకో, ఎంఐయూఐ, శాంసంగ్ మొబైల్ ఫోన్లు, బాధితుడి ఆధార్ కార్డు, పర్స్, హోండా యాక్టివా స్కూటర్, 300 దుబాయ్ దిర్హమ్స్ను పోలీసులు స్వాధీనం చేసుకున్నారు. నిరుద్యోగం, తక్కువ ఆదాయం, సులభంగా డబ్బు సంపాదించాలనే ఆశతో గుంపుగా ఏర్పడి నేరాలకు పాల్పడుతున్నట్లు దర్యాప్తులో తేలింది. అరెస్టు చేసిన నిందితులను రిమాండ్కు తరలించగా, బాల నేరస్తుడిని జువెనైల్ న్యాయ ప్రక్రియ ప్రకారం హాజరుపరిచారు.
