హైదరాబాద్ నగరంలో టీ ప్రియుల ఆరోగ్యాన్ని లక్ష్యంగా చేసుకుని భారీ ఎత్తున కల్తీ టీ పౌడర్ విక్రయిస్తున్న ముఠా గుట్టును పోలీసులు రట్టు చేశారు. H-FAST పోలీసులు జరిపిన మెరుపు దాడుల్లో సుమారు 4 టన్నుల కల్తీ టీ పౌడర్, దానికి సంబంధించిన రసాయనాలను స్వాధీనం చేసుకున్నారు. ఈ కేసులో 10 మందిని అరెస్ట్ చేశారు.
పోలీసులకు అందిన విశ్వసనీయ సమాచారం మేరకు, నగరంలోని పలు ప్రాంతాల్లో రహస్యంగా నిర్వహిస్తున్న కల్తీ టీ పౌడర్ తయారీ కేంద్రాలపై H-FAST బృందాలు ఏకకాలంలో దాడులు నిర్వహించాయి. ఈ దాడుల్లో, వాడి పారేసిన టీ పొడిని సేకరించి, దానికి హానికరమైన రంగులు, కృత్రిమ వాసనలు కలిపి తిరిగి ప్యాక్ చేస్తున్నట్లు అధికారులు గుర్తించారు. ఈ కల్తీ టీ పౌడర్ చూడటానికి అసలైన టీ పౌడర్ లాగే ఉండేలా ప్రత్యేక రసాయనాలను ఉపయోగిస్తున్నట్లు విచారణలో తేలింది.
ఈ దందాలో పాలుపంచుకుంటున్న 10 మందిని పోలీసులు అదుపులోకి తీసుకున్నారు. వీరిలో కల్తీ టీ పౌడర్ తయారు చేసే ప్రధాన సూత్రధారులతో పాటు, ఈ కల్తీ సరుకును తక్కువ ధరకు కొనుగోలు చేసి విక్రయిస్తున్న టీ షాప్ యజమానులు కూడా ఉన్నారని సమాచారం. వీరిపై కఠిన చర్యలు తీసుకుంటామని పోలీసులు తెలిపారు.
ఆహార భద్రతా నిపుణులు ఈ కల్తీ టీ పౌడర్ వాడకంపై తీవ్ర ఆందోళన వ్యక్తం చేశారు. ఈ టీ పౌడర్లో ఉపయోగించే రసాయనాలు, రంగులు క్యాన్సర్ వంటి ప్రాణాంతక వ్యాధులకు దారితీసే ప్రమాదం ఉందని హెచ్చరించారు. ప్రజలు నాణ్యత లేని, చౌకగా లభించే టీ పౌడర్ విషయంలో అప్రమత్తంగా ఉండాలని సూచించారు.
