కామారెడ్డి జిల్లా రాజంపేట బస్టాండ్ చౌరస్తాలో ప్రజలకు సైబర్ నేరాల నివారణ, రోడ్డు భద్రత, వేసవికాల జాగ్రత్తలపై పోలీసులు ప్రత్యేక అవగాహన కార్యక్రమం నిర్వహించారు.
కామారెడ్డి జిల్లా సూపరింటెండెంట్ ఆఫ్ పోలీస్ ఎం. రాజేష్ చంద్ర ఐపీఎస్ ఆదేశాల మేరకు, రాజంపేట సబ్-ఇన్స్పెక్టర్ ఎన్. రాజు సూచనలతో పోలీస్ కళాబృందం ఈ కార్యక్రమాన్ని చేపట్టింది. ఈ సందర్భంగా సైబర్ నేరాలపై ప్రజలను అప్రమత్తం చేస్తూ, OTP వంటి గోప్య సమాచారాన్ని ఎవరికీ వెల్లడించవద్దని సూచించారు. మోసపూరిత కాల్స్ లేదా సందేశాలు వస్తే వెంటనే సైబర్ క్రైమ్ టోల్ ఫ్రీ నంబర్ 1930కు ఫిర్యాదు చేయాలని తెలిపారు.
రోడ్డు భద్రతపై కూడా అవగాహన కల్పించారు. మైనర్లు వాహనాలు నడపకూడదని, ట్రిపుల్ రైడింగ్ చేయవద్దని, తప్పనిసరిగా హెల్మెట్ ధరించాలని సూచించారు. మద్యం సేవించి వాహనాలు నడపడం ప్రాణాపాయానికి దారితీస్తుందని హెచ్చరించారు. అత్యవసర పరిస్థితుల్లో 100 నంబర్కు కాల్ చేయాలని సూచించారు.
వేసవికాలంలో తీసుకోవాల్సిన జాగ్రత్తలను కూడా వివరించారు. తీవ్ర ఎండల సమయంలో నీరు ఎక్కువగా తీసుకోవడం, అవసరమైతేనే బయటకు వెళ్లడం వంటి సూచనలు ఇచ్చారు.
పోలీస్ కళాబృందం ఇన్చార్జ్ హెడ్ కానిస్టేబుల్ రామంచ తిరుపతి, పోలీస్ కానిస్టేబుల్ సాయిలు పాటలు, మాటల ద్వారా ఈ కార్యక్రమాన్ని ఆకర్షణీయంగా నిర్వహించారు. ఈ కార్యక్రమంలో షీ టీమ్ సభ్యులు, రాజంపేట హెడ్ కానిస్టేబుల్, ఇతర సిబ్బంది పాల్గొన్నారు. వివిధ వర్గాల ప్రజలు పెద్ద సంఖ్యలో పాల్గొని కార్యక్రమాన్ని విజయవంతం చేశారు.
