ఇంటర్నేషనల్ వైశ్య ఫెడరేషన్ (ఐవిఎఫ్) కామారెడ్డి జిల్లా విభాగం ఆధ్వర్యంలో, భగవద్గీత పారాయణ మహా యజ్ఞంలో భాగంగా నిర్వహించిన పోటీల్లో బంగారు పతకాలు సాధించిన 13 మందిని ఘనంగా సన్మానించారు. ఈ సందర్భంగా భగవద్గీత జ్ఞానం యొక్క ప్రాముఖ్యతను నొక్కి చెప్పారు.
శ్రీ గీతా పరివార్ ఆధ్వర్యంలో జరిగిన ఈ పోటీల్లో, సంపూర్ణ భగవద్గీతలోని 18 అధ్యాయాలను, 700 శ్లోకాలను కంఠస్థం చేసిన వారికి బంగారు పతకాలు ప్రదానం చేశారు. ఈ సన్మాన కార్యక్రమం కల్కి ఆలయంలో జరిగింది.
ఐవిఎఫ్ సేవాదళ్ రాష్ట్ర చైర్మన్ డాక్టర్ బాలు, జిల్లా అధ్యక్షులు ఎర్రం చంద్రశేఖర్ మాట్లాడుతూ, భగవద్గీత జ్ఞానం మానవ జీవితంలోని సమస్యలకు పరిష్కారం చూపుతుందని, ఉన్నత విలువలతో కూడిన వ్యక్తుల నిర్మాణానికి ఇది దోహదపడుతుందని అన్నారు. ప్రతి పాఠశాలలో భగవద్గీతను బోధించాలని ప్రభుత్వానికి విజ్ఞప్తి చేశారు.
సన్మానం అందుకున్న వారిలో డాక్టర్ రాధా విజయలక్ష్మి దేవరకొండ, నంగునూరు సులోచన, లీలావతి రాజు, అందె శ్రీదేవి, పడిగల రమాదేవి, దువ్వల మమత, దువ్వల కుశాల్, యేల్లంకి పల్లవి, దోమకొండ ప్రేమలత, పార్శి విజయ్, లాబిశెట్టి పద్మ, బార్ల రాధ, బార్ల ఆర్య ఉన్నారు. వీరికి పూలమాల, శాలువా, ప్రశంస పురస్కారాలు అందజేశారు.
ఐవిఎఫ్ జిల్లా ప్రధాన కార్యదర్శి, కోశాధికారి దొంతి సుధాకర్, కస్వ వెంకన్నలు మాట్లాడుతూ, ఐవిఎఫ్ సామాజిక సేవా కార్యక్రమాలను విస్తృతంగా నిర్వహిస్తోందని, సమాజంలోని అన్ని వర్గాల అభివృద్ధికి కృషి చేస్తోందని తెలిపారు. ఈ కార్యక్రమంలో ఐవిఎఫ్ సభ్యులు, వివిధ విభాగాల ప్రతినిధులు పాల్గొన్నారు.
