బాబు జగ్జీవన్ రామ్ 119వ జయంతి వేడుకలు: సామాజిక న్యాయం, సమానత్వం ఆశయాలు స్మరణ

జిల్లా కేంద్రంలోని మున్సిపల్ కార్యాలయంలో జరిగిన ఈ కార్యక్రమంలో జిల్లా కలెక్టర్ ఆశిష్ సాంగ్వాన్ ముఖ్య అతిథిగా పాల్గొని, బాబు జగ్జీవన్ రామ్ చిత్రపటానికి నివాళులర్పించారు. ఆయన దేశానికి అందించిన సేవలను స్మరించుకోవడం ప్రతి ఒక్కరి బాధ్యత అని కలెక్టర్ పేర్కొన్నారు.

సామాజిక న్యాయం, సమానత్వం కోసం బాబు జగ్జీవన్ రామ్ జీవితాంతం కృషి చేశారని, ఆయన ఆశయాలు నేటి తరానికి స్ఫూర్తిదాయకమని కలెక్టర్ కొనియాడారు. వెనుకబడిన వర్గాల అభివృద్ధికి ఆయన చేసిన సేవలు చిరస్మరణీయమని తెలిపారు.

కేంద్ర మంత్రిగా, ఉప ప్రధానిగా ఆయన వ్యవసాయం, రక్షణ, కార్మిక రంగాలలో కీలక నిర్ణయాలు తీసుకుని దేశాభివృద్ధికి దోహదపడ్డారని గుర్తుచేశారు. ముఖ్యంగా రక్షణ శాఖ మంత్రిగా దేశ భద్రతను బలోపేతం చేయడంలో ఆయన పాత్ర ప్రశంసనీయమని పేర్కొన్నారు.

ఈ కార్యక్రమంలో అదనపు కలెక్టర్ మధుమెహన్, ఆర్డీఓ ఎన్వీ గిరి, మున్సిపల్ చైర్‌పర్సన్ ఉమారాణి, ఎస్సీ కార్పొరేషన్ అధికారి వెంకటేశ్వర్లు, జిల్లా అధికారులు, వివిధ సంఘాల ప్రతినిధులు, నాయకులు, ప్రజలు పాల్గొన్నారు. పలువురు వక్తలు కూడా బాబు జగ్జీవన్ రామ్ సేవలను స్మరించుకున్నారు.