మునిగడపలో ఘనంగా అంబేద్కర్ జయంతి: మాదిగ జర్నలిస్ట్ ఫోరం ఆధ్వర్యంలో ర్యాలీ

అంబేద్కర్ జయంతి సందర్భంగా మునిగడపలో జరిగిన కార్యక్రమంలో భాగంగా, గ్రామ ప్రధాన వీధుల గుండా ‘జై భీమ్’ నినాదాలతో ర్యాలీ నిర్వహించారు. అనంతరం అంబేద్కర్ విగ్రహానికి పూలమాలలు వేసి నివాళులర్పించారు. ఈ కార్యక్రమానికి మాదిగ జర్నలిస్ట్ ఫోరం రాష్ట్ర కార్యదర్శి మరాఠీ కృష్ణమూర్తి తన కుటుంబ సభ్యులతో కలిసి హాజరయ్యారు.

ఈ సందర్భంగా మరాఠీ కృష్ణమూర్తి మాట్లాడుతూ, అంబేద్కర్ ఒక వ్యక్తి మాత్రమే కాదని, ఆయన ఒక చరిత్ర అని అభివర్ణించారు. బానిసత్వపు సంకెళ్లను తెంచి, కోట్లాది మంది జీవితాల్లో వెలుగులు నింపిన మహాశక్తి అని ప్రశంసించారు. "విద్య అనేది సింహం పాలు లాంటిది" అని చెప్పి, ప్రజలను చదువుకోమని ఆదేశించిన తండ్రిగా అంబేద్కర్ ను అభివర్ణించారు.

అంబేద్కర్ ఆశయాలు ఇంటి నుండే ప్రారంభం కావాలని, పిల్లలకు ఆయన గురించి, ఆయన రచనల గురించి చిన్నతనం నుంచే వివరించాలని కృష్ణమూర్తి సూచించారు. తమ కుటుంబ సభ్యులతో కలిసి ఈ కార్యక్రమంలో పాల్గొనడం ద్వారా పిల్లలకు స్ఫూర్తినివ్వాలనే ఉద్దేశ్యంతోనే ఇక్కడికి వచ్చానని తెలిపారు. ఇంట్లో అంబేద్కర్ రాసిన పుస్తకాలు తప్పనిసరిగా ఉండాలని ఆయన సూచించారు.

సమాజంలో అణగారిన వర్గాల గొంతుకను వినిపించడానికే మాదిగ జర్నలిస్ట్ ఫోరం స్థాపించబడిందని, అంబేద్కర్ ఇచ్చిన కలాన్ని ఆయుధంగా మార్చి అసమానతలపై పోరాడటమే తమ లక్ష్యమని కృష్ణమూర్తి పేర్కొన్నారు. రాజ్యాంగంలోని న్యాయం, సమానత్వం, సౌభ్రాతృత్వం వంటి విలువలను కాపాడటానికి ప్రతి ఒక్కరూ కృషి చేయాలని ఆయన పిలుపునిచ్చారు. కేవలం విగ్రహారాధనతో పాటు, ఆయన ఆశయాలను ఆచరణలో పెట్టడం ముఖ్యమని నొక్కి చెప్పారు.