యాసంగి 2025-26 వరి ధాన్యం కొనుగోలు ప్రక్రియను పారదర్శకంగా, సమర్థవంతంగా నిర్వహించాలని అదనపు కలెక్టర్ వేణుగోపాల్ సంబంధిత అధికారులకు సూచించారు. జిల్లా కార్యాలయంలో శనివారం జరిగిన సమీక్షా సమావేశంలో ఈ మేరకు ఆదేశాలు జారీ చేశారు.
జిల్లాలో ఈ సీజన్లో సుమారు 83,000 మెట్రిక్ టన్నుల వరి ధాన్యాన్ని రైతుల నుంచి కొనుగోలు చేసే లక్ష్యంతో అధికారులు ముందుకు సాగుతున్నారు. కొనుగోలు కేంద్రాలకు వచ్చే ధాన్యం నాణ్యతను వ్యవసాయ శాఖ అధికారులు క్షుణ్ణంగా పరిశీలించి, అర్హత కలిగిన ధాన్యానికి మాత్రమే కొనుగోలు పత్రాలు, టోకెన్లు జారీ చేయాలని అదనపు కలెక్టర్ స్పష్టం చేశారు.
సమావేశంలో రైస్ మిల్లర్లు PR-126 వరి రకంపై తమ ఆందోళనలను వ్యక్తం చేశారు. ఈ రకంలో పిన్పాయింట్ డ్యామేజ్ సమస్య కారణంగా ఎఫ్సీఐ వద్ద బియ్యం ఆమోదం పొందడంలో ఎదురవుతున్న ఇబ్బందులను వారు వివరించారు. ఈ సమస్యను పరిష్కరించడానికి సంబంధిత అధికారులు సమన్వయంతో వ్యవహరించి, ఎఫ్సీఐ వద్ద బియ్యం సజావుగా ఆమోదం పొందేలా చర్యలు తీసుకోవాలని అదనపు కలెక్టర్ ఆదేశించారు.
కొనుగోలు కేంద్రాల వద్ద రైతులకు మెరుగైన సౌకర్యాలు కల్పించాలని, ధాన్యం కొనుగోలు ప్రక్రియను వేగవంతం చేయాలని సూచించారు. అధిక ఉష్ణోగ్రతల దృష్ట్యా, రైతులు వాతావరణం అనుకూలించినప్పుడు ధాన్యాన్ని తీసుకురావాలని అవగాహన కల్పించాలని అధికారులకు సూచించారు. రైస్ మిల్లర్లు తమ మిల్లుల వద్ద ధాన్యం దిగుమతికి అవసరమైన ఏర్పాట్లు చేసుకోవాలని కూడా అదనపు కలెక్టర్ తెలిపారు.
