వ్యవసాయ రంగాన్ని, దేశాన్ని రక్షించుకోవాలని అఖిల భారత కిసాన్ మజ్దూర్ సభ (ఏఐకేఎంఎస్) పిలుపునిచ్చింది. ఈ మేరకు ఖమ్మంలో జరిగిన ఏఐకేఎంఎస్ జాతీయ కమిటీ సమావేశంలో పలు కీలక తీర్మానాలు ఆమోదించారు. కార్పొరేట్ సంస్థల ప్రయోజనాలను కాపాడేందుకు కేంద్ర ప్రభుత్వం రైతులపై దాడులు చేస్తోందని ఆరోపించారు.
ఖమ్మంలో రెండు రోజుల పాటు జరిగిన అఖిల భారత కిసాన్ మజ్దూర్ సభ (ఏఐకేఎంఎస్) కేంద్ర కార్యనిర్వహకవర్గ సమావేశంలో, 'వ్యవసాయాన్ని కాపాడండి దేశాన్ని రక్షించండి' అనే నినాదంతో వ్యవసాయ విప్లవానికి ప్రజలు సిద్ధం కావాలని పిలుపునిచ్చారు. సెప్టెంబర్ 2026లో ఖమ్మంలో జరగనున్న ఏఐకేఎంఎస్ జాతీయ మహాసభలను జయప్రదం చేయాలని కోరారు.
కేంద్ర ప్రభుత్వం విదేశీ సంస్థలు, కార్పొరేట్ సంస్థల లాభాలను పెంచేందుకు రైతాంగాన్ని, వారి జీవనాధారాలను బలహీనపరిచే లక్ష్యంతో దాడులు తీవ్రతరం చేస్తుందని సమావేశంలో చర్చించారు. జాతీయ ఉపాధి హామీ పథకం స్థానంలో తీసుకువస్తున్న వీబీ రామ్ జీ చట్టాన్ని తీవ్రంగా వ్యతిరేకిస్తూ, ఇది సరఫరా ఆధారిత పథకంగా మారుతుందని, హామీలు ఉండవని విమర్శించారు.
కొత్త విద్యుత్ బిల్లు 2025ను ఉపసంహరించుకోవాలని, 300 యూనిట్ల ఉచిత విద్యుత్, సాగునీటికి ఉచిత విద్యుత్ అందించాలని ఏఐకేఎంఎస్ డిమాండ్ చేసింది. స్మార్ట్ ప్రీ-పెయిడ్ మీటర్ల ఏర్పాటును వ్యతిరేకిస్తూ, విద్యుత్ అనేది అత్యవసరమని, కంపెనీల లాభాల కోసం ప్రజలను చీకట్లోకి నెట్టలేరని స్పష్టం చేసింది. కొత్త విత్తన బిల్లు 2025 కూడా హానికరమని, ఇది భారత విత్తన సార్వభౌమత్వాన్ని దెబ్బతీస్తుందని ఆందోళన వ్యక్తం చేసింది.
మోదీ ప్రభుత్వం, ట్రంప్ ప్రభుత్వంతో కుదుర్చుకున్న ద్వైపాక్షిక వాణిజ్య ఒప్పందం భారత వ్యవసాయ స్వయం అభివృద్ధిని దెబ్బతీస్తుందని సమావేశం అభిప్రాయపడింది. కార్పొరేట్ రుణాలను మాఫీ చేస్తూ, రైతులను అధిక ధరలకు గురిచేస్తున్నారని, ఎం.ఎస్. స్వామినాథన్ కమిషన్ ఫార్ములా ప్రకారం కొనుగోళ్లకు హామీ ఇవ్వడం లేదని విమర్శించారు. భూసేకరణ, వ్యవసాయ భూమిని వ్యవసాయేతర ప్రయోజనాలకు మళ్లించడాన్ని కూడా తీవ్రంగా పరిగణించారు. అమెరికా, ఇజ్రాయిల్ దురాక్రమణ యుద్ధాన్ని ఖండించి, వెంటనే ఆపాలని డిమాండ్ చేశారు. ఖమ్మంలో భూదాన్ భూమిలో నివాసం ఉంటున్న వారి ఇళ్లను కూల్చివేయడాన్ని ఖండించి, అర్హులైన పేదలకు భూదాన భూములను వెంటనే పంపిణీ చేయాలని రాష్ట్ర ప్రభుత్వాన్ని కోరారు.
