కరీంనగర్ జిల్లా ఇల్లందకుంట మండల కేంద్రంలో ఐసీడీఎస్ ఆధ్వర్యంలో 'పోషణ్ పక్వాడా' కార్యక్రమాన్ని ఘనంగా నిర్వహించారు. ఈ సందర్భంగా గర్భిణులకు శ్రీమంతాలు, చిన్నారులకు అన్నప్రాశన చేశారు. అలాగే, ప్రీ-స్కూల్ మేళాను కూడా ఏర్పాటు చేశారు.
ఐసీడీఎస్ ఆధ్వర్యంలో జరిగిన ఈ కార్యక్రమంలో 15 మంది గర్భిణీ స్త్రీలకు సంప్రదాయబద్ధంగా శ్రీమంతాలు చేయగా, నలుగురు చిన్నారులకు అన్నప్రాశన కార్యక్రమం నిర్వహించారు. ఈ వేడుకలకు స్థానిక సర్పంచ్ దార సురేష్, తాసిల్దార్ భాస్కర్, ఎంపీడీఓ రాజేశ్వరరావు, ఎస్ఐ క్రాంతి కుమార్, ఐకేపీ ఏపీఎం స్వామి కుమార్ హాజరయ్యారు.
సీడీపీఓ సుగుణ మాట్లాడుతూ, గర్భిణీలు, బాలింతలు, చిన్నారులు పౌష్టికాహారం తీసుకోవడం ద్వారా ఆరోగ్యకరమైన సమాజాన్ని నిర్మించవచ్చని తెలిపారు. అంగన్వాడీ కేంద్రాల ద్వారా ప్రభుత్వం అందిస్తున్న పోషక విలువలతో కూడిన ఆహారాన్ని సద్వినియోగం చేసుకోవాలని సూచించారు.
చిన్నారుల విద్యా వికాసం కోసం ఏర్పాటు చేసిన 'ప్రీ-స్కూల్ మేళా'లో విద్యా సామగ్రిని అధికారులు పరిశీలించారు. ఈ మేళాలో చిన్న పిల్లల్లో ఆటపాటల ద్వారా అభ్యసన సామర్థ్యాన్ని పెంచేందుకు ఉపయోగపడే విద్యా పరికరాలు, చార్టులు ప్రదర్శించారు. ఇవి అందరినీ ఆకట్టుకున్నాయి.
పోషణ్ పక్వాడా కార్యక్రమంలో భాగంగా అంగన్వాడీ కేంద్రాల ఆధ్వర్యంలో స్థానిక ఆకుకూరలు, ధాన్యాలు, పౌష్టికాహారంతో కూడిన ప్రదర్శనను ఏర్పాటు చేశారు. గర్భిణీలకు తీసుకోవాల్సిన ఆహారంపై అవగాహన కల్పించారు. గర్భిణీలకు శ్రీమంతాలు చేయడం వారి మానసిక, శారీరక బలానికి దోహదపడుతుందని వివరించారు.
