రాబోయే వారం రోజులు తెలుగు రాష్ట్రాల్లో ఎండలు ఠారెత్తించనున్నాయని వాతావరణ శాఖ హెచ్చరించింది. గరిష్ఠ ఉష్ణోగ్రతలు 45 డిగ్రీలు దాటే అవకాశం ఉందని, ప్రజలు అప్రమత్తంగా ఉండాలని సూచించింది.
ఈ నెల 19 నుంచి 24వ తేదీల మధ్య తెలుగు రాష్ట్రాల్లో తీవ్రమైన ఎండలు నమోదయ్యే అవకాశం ఉందని వాతావరణ శాఖ తెలిపింది. సగటు ఉష్ణోగ్రతలు 45 డిగ్రీల సెల్సియస్ను దాటే ప్రమాదం ఉందని, వడగాలులు వీచే అవకాశం ఉందని హెచ్చరించింది.
వాతావరణ శాఖ నిపుణుల ప్రకారం, ఉదయం 10:30 గంటల నుండి సాయంత్రం 4 గంటల మధ్య బయటి వాతావరణంలోకి వెళ్లడం ఆరోగ్యానికి హానికరం కావచ్చు. కాబట్టి, ఈ సమయంలో బయట తిరగడం తగ్గించాలని సూచించారు.
తెలంగాణలో, ఆదిలాబాద్, కుమురం భీం, నిర్మల్, జగిత్యాల, మంచిర్యాల జిల్లాలకు అధికారులు రెడ్ అలర్ట్ జారీ చేశారు. ఈ జిల్లాల్లో అత్యధిక ఉష్ణోగ్రతలు నమోదయ్యే అవకాశం ఉంది.
ఇంకా, రాష్ట్రంలోని 16 జిల్లాలకు ఆరెంజ్ అలర్ట్ జారీ చేయబడింది. ఈ జిల్లాల్లో 41 నుండి 44 డిగ్రీల సెల్సియస్ వరకు ఉష్ణోగ్రతలు నమోదయ్యే అవకాశం ఉంది. సోమవారం ఏడు జిల్లాల్లో 45 డిగ్రీలకు పైగా ఉష్ణోగ్రతలు నమోదయ్యే అవకాశం ఉందని వాతావరణ శాఖ అంచనా వేసింది.
