రాష్ట్ర స్థాయిలో ప్రతిభావంతులైన క్రీడాకారులను ప్రోత్సహించేందుకు ఏర్పాటు చేసిన హకీంపేట్ స్పోర్ట్స్ స్కూల్లో ప్రవేశానికి ఆన్లైన్ నమోదు గడువును మార్చి 12 వరకు పొడిగించినట్లు జిల్లా కలెక్టర్ ఆశిష్ సాంగ్వాన్ తెలిపారు.
కామారెడ్డి జిల్లా కలెక్టరేట్లోని వీడియో కాన్ఫరెన్స్ హాల్లో జిల్లా కలెక్టర్ ఆశిష్ సాంగ్వాన్ గురువారం స్పోర్ట్స్ స్కూల్కు సంబంధించిన పోస్టర్ను ఆవిష్కరించారు. ఈ సందర్భంగా ఆయన మాట్లాడుతూ, క్రీడా రంగంలో రాణించాలనుకునే యువతకు ఈ స్పోర్ట్స్ స్కూల్ ఒక చక్కని అవకాశమని పేర్కొన్నారు.
ఇప్పటివరకు ఆన్లైన్ ద్వారా దరఖాస్తు చేసుకున్న విద్యార్థులతో పాటు, మరికొంత మందికి అవకాశం కల్పించేందుకు నమోదు గడువును పొడిగించినట్లు కలెక్టర్ వెల్లడించారు. అర్హులైన విద్యార్థులు ఈ అవకాశాన్ని సద్వినియోగం చేసుకోవాలని ఆయన సూచించారు.
హకీంపేట్ స్పోర్ట్స్ స్కూల్ ద్వారా క్రీడాకారులకు మెరుగైన శిక్షణ, సౌకర్యాలు అందుబాటులోకి వస్తాయి. ఇది వారి భవిష్యత్తుకు దోహదపడుతుందని అధికారులు తెలిపారు.
ఈ కార్యక్రమంలో జిల్లా అదనపు కలెక్టర్ మధుమోహన్, జిల్లా పరిషత్ సీఈవో రంగ వెంకటేశ్వర్ గౌడ్, ఆర్డీవో వీణ, జిల్లా యువజన మరియు క్రీడల శాఖ అధికారి, జిల్లా విద్యాశాఖ అధికారి, మున్సిపల్ కమిషనర్ తదితర అధికారులు పాల్గొన్నారు.